今日早上終於同媽咪見面啦！真開心！今日係媽咪三七,二十一日啦,先至响夢裏面見到媽咪,我仲以為媽咪唔會報夢俾我，响個夢裏面我哋全家人坐响度睇煙花,我個鏡頭就見到我二哥Andy同埋我前姐夫Albert,佢𠵱𠵱哦哦响度講嘢,而Andy就响度笑笑笑，媽咪就坐响我右邊,而另一個畫面就係我同媽咪坐响大家姐架車後面,有一隻手（可能係二姐或者大家姐隻手！）响前面伸向後面,問媽咪佢修甲修得靚唔靚，媽咪捉住佢隻肥手指公睇一睇，就笑笑口話幾好呀！跟住就向坐响佢左面嘅我講咗句說話,佢笑住話：我咁樣瞓住走,不知...幾...舒...服！佢笑得好開心,跟住就瞓咗响seat位上面，之後我就話：我唔制...我要好似你咁樣,我要同你一齊！跟住我就迫埋佢身邊瞓响度，然後我就醒咗啦！
雖然醒咗,無得再同媽咪講嘢,但好開心,因為終於見番媽咪！同埋我要即刻詳細Ｄ寫低個夢,因為我驚遲Ｄ唔記得咗Ｄ細節,又唔知幾時媽咪先至再call我嘛！都係寫低穩陣Ｄ！
而我哋從各方高人口中,得知媽咪進了佛道,仲要係幾高果層,後來我哋回想起媽咪走嘅時候個姿勢係好特別,在床上近似以坐蓮嘅手和腳姿勢,仲要撥開張被,好似特登俾我哋睇咁,真係希望媽咪真的進了佛道,我哋先可以收拾心情重投工作！
媽咪：
多謝您生咗我哋呢五隻人間極品，
多謝您辛辛苦苦養大我哋呢五隻化骨龍，
多謝您教精咗我哋呢五隻蠢蛋，
我哋會日日掛住您,
您得閒就嚟探吓我哋啦！
祝您 法力無邊,仲有多Ｄ搵亞爸去吓雲遊都唔錯㗎！
你的女兒
八婆娟上
